العفاريت والسحر الاسود والجان وتناسخ الأرواح فى المسيحية

 العفاريت و الأشباح و الأرواح النجسة و الشياطين و السحر الاسود و المارد و تحضير  و الأعمال و التنجيم و الأبراج و حظك اليوم إلخ ..
(((( + موضوع شامل + ))))

** هل المسيحية تؤمن بوجود الكيانات دي ؟؟ هل فيه إختلاف ما بينها ؟؟ هل لها تأثير على الإنسان ؟؟ هل إستخدامها خطية ؟؟ أسئلة كتير أوي أوي .. هنلخص الموضوع في كام نقطة نركز فيهم ..

+ (1) إيه هو الجن و الجان ؟؟ و الشبح ؟؟ و العفريت ؟؟ و القرين ؟؟ و المارد ؟؟ فيه إختلاف بينهم ؟؟
مفيش حاجة في المسيحية إسمها ( جن أو جان ) .الترجمه العربى بس فيها. مفيش روح كافر أو روح مؤمن يعني مفيش جن طيب زي جني المصباح بتاع علاء الدين ولا جن شرير زي عادل إمام لما كان بيطلع ليسرا !! احنا بنؤمن فقط بوجود الأرواح الشريرة (( الشيطان و جنوده )).. و الشيطان عندنا بدون شك كلنا عارفين إنه كان ملاك عظيم و سقط نتيجة لغروره و كبريائه " كيف سقطت من السماء يا زهرة بنت الصبح كيف قطعت إلي الأرض يا قاهر الأمم وأنت قلت في قلبك أصعد إلي السموات أرفع كرسي فوق كواكب الله… أصعد فوق مرتفعات السحاب أصير مثل العلي لكنك انحدرت إلي الهاوية إلي أسافل الجب" .. إذن ربنا كلي الصلاح لم يخلق طبعا هذا الكائن ذو الأصل الشرير !!
إذن مملكة الشيطان منها تخرج كل المسميات دي .. مفيش بقى جان ولا دي روح شخص مقتول أو أرواح منتقلين إلخ ... هم ممكن ياخدوا أشكال خيالات أو أصوات أو حتى اشكال ملائكة ..
و هنا من بعض مصادر الآباء الأولين بيقولوا .. اجتهد بعض علماء الروحيات في تصنيفهم .. يعني كلمة العفاريت دي إشارة للشياطين اللي بيقدروا ياخدوا أشكال مخيفة و يولعوا النار و يؤذوا الأشخاص جسديا زي الأنبا أنطونيوس .. أو القصة في بستان الرهبان .. عن الراهب اللي الشيطان اتخذ شكل صخرة و اسقطه على الأرض .. و القرين إنه شيطان بيفضل ملازم الشخص زي ملاكه الحارس و يحاول يهلكه .. و المارد إنه شيطان المس الجسدي اللي بيأذي الجسد بأمراض .. إلخ .. لكن الحقيقة عدم وجود سند كتابي للمسميات يخلينا نقول إنه ببساطة شديدة .. كلها من مملكة الشيطان و جنوده و أتباعه .. و محدش منهم يقدر يأذي إلا بسماح من ربنا زي ما هنفهم في الأسئلة الجاية ..

+ (2) هل الأرواح دي تستطيع إنها تسكن جسد إنسان ؟؟

أيوة .. تقدر تحل روح شرير في شخص و تسبب له آلام نفسية و جسدية .. و الدليل على كدة تأكيدات السيد المسيح بمخاطبته الأرواح النجسة في الكتاب المقدس و سلطانه عليها و إخراجها بكلمة من فمه .. " و لما صار المساء قدموا إليه مجانين كثيرين فأخرج الأرواح بكلمة و جميع المرضى شفاهم " ...
" و حدث بينما كنا ذاهبين إلى الصلاة أن جارية ((بها روح)) عرافة استقبلتنا "

+ (3) طيب انا اخاف إن معنى كدة إن الأرواح دي تقدر تسكن روح أي حد حتى لو مؤمن ؟؟ ((( أهم سؤال و إجابته طويلة شوية )))

" روح الحق الذي لا يستطيع العالم أن يقبله لأنه لا يراه ولا يعرفه و أما أنتم فتعرفونه لأنه ماكث معكم و يكون فيكم "
إذن روح الله يسكن فينا كمؤمنين .. هينفع يسكن الشيطان معاه ؟؟ طبعا طبعا مينفعش ..
و مفيش آية بتطلب إخراج الأرواح الشريرة من المؤمنين !!
بل بالعكس المؤمن هو اللي ليه سلطان يخرج الروح دي .. بدليل كلام الرب لتلاميذه ..
" اشفوا مرضى .. طهروا برصا .. أقيموا موتى .. أخرجوا شياطين "
و مننساش كمان " و أما هذا الجنس لا يخرج إلا بالصلاة و الصوم " ..
إذن صوم + صلاة + إيمان = تخليك تخرج الروح النجس من شخص باسم المسيح ..
هل يبقى منطقي في وجود ال3 عناصر دول في حياتك إن الروح دي تتسلط على روحك إنت ؟؟
و عشان نفرق بين المرض النفسي و مس الشيطان و سكنى الشيطان للإنسان ... نفرق بين ..
1- تملك الشيطان و سيطرته على ((روح)) شخص .. بأن يسكن فيه .. نتيجة تسليم الشخص ده روحه للشيطان ... ( أقرب مثال عندنا عبدة الشيطان مثلا و السحرة و غيرهم .. ) و طبعا فيه تفاوت في درجة التملك دي .. زي قصة ( لجئون ) .. و هنا بيبان أوي إن الشيطان بيثور أكتر في وجود ربنا .. و كان بيحصل كدة بمجرد اقتراب الشخص من يسوع .. " ما لنا و لك يا يسوع الناصري .. هل أتيت لتهلكنا ؟؟ "
2- تسلط الشيطان على (( جسد و نفس شخص )) بسماح من ربنا .. بنقول عليه ( مس شيطان ) .. زي المراة المنحنية اللي الشيطان ربطها 18 سنة .. و ممكن نتيجة خطية بسيطة أو إن المؤمن وارب الباب للشيطان بأي طريقة أو بعد عن الصلاة و الصوم .. هنا ممكن الروح تتسلط جزئيا على جسد المؤمن و عقله لكن ليس على روحه .. و بتبعد بمجرد التوبة .... زي أيوب مثلا كان عنده ثغرة و هي انه كان بار في عيني نفسه .. فحصل له مس من الشيطان في جسده .. و ربنا كمان منع الشيطان إنه يمد يده لنفسه لما طلب منه ده .. و ممكن يكون الهدف مصلحة الشخص و هدف أعمق لربنا زي الشاب اللي أبوه راح للمسيح قاله ابني متبهدل و بيرمي نفسه في النار و لما وديته لتلاميذك مقدروش يشفوه .. فانتهر الشيطان و خرج في الحال .. و قال للتلاميذ كنتوا تقدروا تخرجوه لو كان فيكم إيمان .. و كان الهدف تثبيت الإيمان و التأكيد عليه إنه ينقل الجبال .. و نلاقي ربنا في قصة تانية يقول .. إذهب لأهلك و بيتك و أخبرهم كم صنع بك الرب و رحمك ..
3- فيه حالة تانية الشيطان ملوش دور خالص .. و ده مرض نفسي بمعنى اضطراب عقلي و خلل في الوظائف المعرفية و السلوكية لشخص ما .. نتيجة لعوامل كتير بيتم معالجتها طبيا .. و الفرق بيكون واضح جدا مع الحالات اللي فوق دي ..

+ (4) هل فيه حاجة إسمها إن شيطان يتزوج من إنسان ؟؟ نسمع إن فيه مارد بيحب بنت مثلا و يمنع العرسان من إنهم يتجوزوها عشان هو نفسه يتجوزها ؟؟

:D
طبعا مفيش الكلام ده نهائي .. الشياطين أرواح .. ملائكة و سقطت .. و نشوف تأكيد إن الأرواح ملهاش زواج من الآية دي ..
" لأنهم في القيامة لا يزوجون ولا يتزوجون، بل يكونون كملائكة الله في السماء "
لكن الشيطان يقدر ياخد أي شكل سواء خيالات نترجمها إحنا و نقول أشباح .. و نفتكر هنا التلاميذ لما شافوا المسيح ماشي على المياه ظنوه أنه شبح .. و الخيالات دي ممكن ياخدها الشيطان لأهداف متنوعة زي قصص كتير في بستان الرهبان .. بل ممكن ياخد وضع جسدي و يضرب و يأذي .. و كمثال القامة العالية للأنبا انطونيوس اللي وصلت غيرة الشياطين منه إنهم ضربوه جسديا .. إذن برضه الشيطان يقدر ياخد شكل رجل أو إمرأة و يظهر للشخص الخاطي اللي سلم روحه ليه بإرادته عشان يشعل الخطية جواه و ممكن إنه ده يوصل لدرجة مادية لدرجة إنه يقنعه إنه كدة متزوج من شخص من الجان مثلا !! .. لكن طبعا ده مجرد تضليل و ملوش أي علاقة بالزواج الفعلي ..

+ (5) الكتب المقدس كان فيه سحرة كتير ذكروا .. إيه هو السحر ؟؟

مكتوب :
" لا يوجد فيك من يجيز ابنه او ابنته في النار ولا من يعرف عرافة ولا عائف ولا متفائل ولا ساحر .. ولا من يرقي رقية ولا من يسال جانا أو تابعه أو يستشير الموتى .. لأن كل من يفعل هذا .. مكروه عند الرب "

إذن ممنوع أي شكل من قراءة الكف أو قراءة الفنجان أو حظك اليوم و (( الأبراج )) !!! أو الأحجبة و التمائم و تحضير الأرواح أو التفاؤل و التشاؤم السحر عموما .. أيوة كل ده خطية كبيرة .. و الشخص ده مكروه من الرب !!
في السحر الشخص اللي بيستخدمه بيدي السلطة للشيطان و بيستخدم قوة أرواح شريرة بأي شكل للتأثير على حياته أو حياة آخرين !!
لكن لازم نفهم الأول إن فيه فرق بين الدجل و السحر و خفة اليد ..
الدجل ده نصب بيستخدمه بعض الأشخاص ملهمش أي علاقة بأي حاجة لكن عايزين يكسبوا فلوس و خلاص بإنهم يوهموا الناس بقدرتهم على التواصل مع الشياطين ( نصب و خطية في أبشع صورها ) .. و نديله مثال تفتكره إنه واحد كدة زي الدجال في فيلم جاءنا البيان التالي ..
خفة اليد يعني الخداع البصري و الحركات المتقنة اللي بيعملها البلياتشو مثلا في بعض فقرات السيرك و ده مش سحر ولا خطية هو entertainment ليها و عليها لكن منقدرش نعتبرها خطية ..
أما السحر فهو شخص بيستخدم قوة الشيطان عن طريق طلاسم و أحجبة و أعمال و ما إلى ذلك و بيكون متعاقد مع الشيطان وواهب روحه ليه .. أما اللي بيستخدم السحر و يصدق فيه فهو بكدة بيسلم إرادته و بيخضع لقوة الشيطان !! و بيتجاوز مشيئة ربنا في حياته !! و الساحر هنا زي سيمون الساحر اللي بان ضعفه و زيفه قصاد فيلبس .. و الساحر باريشوع اللي لقب بإنه نبي كذاب ..
و فيه ناس بتقسم السحر ل((سحر إسود)) عن طريق طلاسم و سحرة و أحجبة و أعمال و رش المية عل عتبة إلخ و كل اللي بيعمل كدة مكروه طبعا عند ربنا بل بيرفض عمل روح الله و يقبل ((عمل)) الشيطان .. و ((سحر أبيض !!)) و هو أخطر و أشد خبثا على شكل مزامير أو كتاب مقدس أو صلوات بطريقة معينة أو أحلام و رؤى كاذبة أو رسائل الإنترنت .. و بحذركم من استخدام كتاب ( *** ***** ) حتى لو بغرض النفع سواء باستخدام مزامير او طلاسم .. لأنه نهايته هوة سحيقة و ضلال و طريق صعب أوي الرجوع منه .. إوعى يبقى سبب صلاتك إن يظهر لك ملاك أو قديس !! إنت بتصلي لربنا و بس .. و تتشفع بملائكته و قديسيه شفاعة توسلية .. أما غير كدة حرب من الشيطان .. و يفضل عدم التبخير برضه في المنزل غير بخور الكاهن .. و ده مدخل للشيطان للأسف عشان يخلي المؤمنين يستخدموا السحر و يقعوا في الخطية المكروهة الكبيرة دي من غير ما يفهموا إنه غلط .. و الكتاب هنا بيقول :
" أألم تروا رؤيا باطلة , و تكلمتم بعرافة كاذبة قائلين وحي الرب و أنا لم أتكلم ؟؟"
و بيقول برضه
" لم أرسلهم و لا أمرتهم و لا كلمتهم . برؤيا كاذبه و عرافه و باطل و فكر قلوبهم هم يتنبأون لكم "

+ (6) طيب إيه هو تأثير السحر و قوته .. و هل ممكن يؤذي شخص ؟؟

حسب قامة الإنسان الروحية .. لو كان غير تائب .. و تجرد من الاسلحة الروحية .. و بقى لوحده في مواجهة الشيطان و كانت حياته في استهتار شديد !!
ممكن يكون له تأثير في حالة كان الشخص ده مبيحصنش نفسه ولا بصوم ولا صلاة و لا تناول بإستمرار .. و كان فاتح و موارب الباب للشيطان بحياة استهتار او خطية ..
ممكن يتسبب في مس جسدي بقى على شكل سقوط على الأرض و تمرغ .. اغماء اثناء الصلاة ثم عودة بعد نهايتها .. تنميل في أماكن معينة في الجسم أثناء الصلاة .. ألم شديد في المفاصل و اجهاد شديد بدون سبب .. ارتيكاريا و هرش مستمر .. صداع مستمر بيبقى اثناء الصلاة بس .. بكاء حاد .. زوغان العينين .. ضيق تنفس مستمر .. التفكير في الإنتحار .. غضب و عصبية شديدة .. كوابيس مستمرة .. إضطرابات في الدورة الشهرية عند النساء بدون سبب طبي .. الربط الجنسي و فقدان الرغبة الجنسية عند المتزوجين .. أو الإفراط غير الطبيعي .. فقدان الشهية .... محبة شخص غير مرغوب فجأة .. كراهية شخص محبوب فجأة .. خوف شديد يأدي لعدم النوم .. أرق مستمر .. خيالات و هلاوس مستمرة .. فشل عملي مستمر .. غيرهااا ..
طبعا طبعا كل ده بدون سبب طبي واضح ... لأن هنا لازم يتم التأكد من الناحية الطبية أولا لأن كل الأعراض دي قد تكون لامراض جسدية بالفعل .. يعني لما الطب بيقول لا مفيش سبب و مفيش في إيدينا حاجة .. بنبدأ لاستشارة المرشد الروحي لأخذ خطوة أخرى .. غير كدة لازم نلجأ للطب أولا ..
و فيه أضرار روحية بقى .. إن المسحور ده بيتمادى في الخطية نظرا ليأسه .. أو إنه الأسوأ يتجه لحل السحر بالسحر و يلجأ للمشعوذين ..

لكن عايزين نقول إن السحر في المقام الاول بيهلك منفذه ... و بيؤذي اللي نظريا مستفيد منه بشكل أكبر .. اما اللي السحر موجه له .. فينطبق عليه نفس الكلام الخاص بتأثير الأرواح النجسة .. في نقطة رقم (3 )

بيقول القديس كيرلس الاورشليمي : لا تذهب وراء هذه الأمور : العرافه , الفأل , التمائم , التعاويذ المكتوبه , السحر , و ما شابه ذلك لأنك لو انسقت اليها بعد ان تكون قد جحدت الشيطان ( في المعموديه ) و تبعت المسيح فستجد المستبد ( الشيطان ) أكثر مراره . و هكذا تسلب من المسيح ليعمل فيك الشيطان ..

+ (7) طيب إيه مدى صدق الفنجان و الكف و الطالع و الودع و التفاؤل و التشاؤم و رسائل الإنترنت اللي لو مبعتهاش لميت واحد تموت و التعاويذ لاستمالة المحبوب إلخ ؟؟

الشيطان له قدرة على معرفة الحاضر و الماضي فقط .. لكن ليس له قدرة على معرفة المستقبل .. و نلاقي الشيطان فضل لغاية موت المسيح على الصليب مش متأكد برضه إنه هو المسيح .. لكن هو عن طريق إستنتاجات من الحاضر يقدر يتوقع المستقبل بنسبة معينة ..
مثال : واحدة قرأت الكف لنت و قالتها جايلك عريس .. بيكون الشيطان عرف من كلام في بيت العريس أو على لسانه إنه هيتقدم لفلانة الفلانية .. إلخ

و هنا بلاش تتلخبط بين اللي بيستخدم العرافة و بين بعض القديسين اللي كان ليهم موهبة النبؤة نتيجة عمل الروح القدس اللي تم تثبيته فيهم بسر الميرون .. و دول بيعمل فيهم الروح بشدة نتيجة حياة جهاد متكاملة و شديدة زي البابا كيرلس السادس مثلا و بيكشف لهم الله اللي عايز يكشفه فقط.. و أكيد الفرق واضح .. و هنا الكتاب بيقول :
" أمتحنوا الأرواح (لتروا) هل هي من عند الله "

أما التفاؤل برؤية حمامة أو بتيشيرت معين أو التشاؤم برقم 13 أو الشبشب المقلوب :D أو بدلق القهوة أو الملح أو إنك تعدي تحت سلم أو انك تشوف قطة سوداء أو عينك ترف = خرافااات طبعا ..
التعاويذ لاستمالة المحبوب أقدر أكتبهالكم هنا لكن لتأكدي إن البعض هيحاول يستخدمها حتى لو على سبيل السخرية مش هكتبها .. طبعا ملهاش تأثير مفيد ولا ضار .. إلا لو تم التعاقد مع الشيطان بالدم .. و طبعا صعب جدا و عايز معجزة حقيقية لانهاء لعنته .. زي القصة اللي بنقراها في حياة البابا باسيليوس و المعجزة العظيمة اللي عملها بفك عقد دم بالصوم و الصلاة ..
اما رسائل الإنترنت من نوعية إبعت الرسالة دي لعشر اشخاص و إلا تموت كأن ربنا أو القديس اللي في الرسالة أو العدرا هيهددك عشان تنشر قصة او آية ..

كل دي خطايا .. طبعا ..

+ (8) إيه بقى تحضير الأرواح ده ؟؟ و روح مين اللي بيحضر في الجلسة ده ؟؟

هنا الكتاب المقدس جاب قصة مثيرة للجدل و مهمة جدا جدا ..
و هي قصة شاول و عرافة عين دور ((( صم1 : 28 )))

شاول الملك .. لما ربنا مبقاش يتواصل معاه بأي طريقة و فارقه روح الرب .. و صموئيل النبي كان مات .. و داخل على حرب مع الفلسطينيين و مش عارف يعمل إيه .. قام راح لعرافة و هو متنكر .. قالها حضريلي روح صموئيل النبي .. قالتله اخاف ده شاول مانع الموضوع ده .. قالها متقلقيش إنتي بس من شاول انا هتصرف معاه :D
المهم قامت مصرخة اول ما شافت الروح و قالتله (( انا شايفة )) آلهة طالعة من الأرض .. شاول قالها قوليلي شكله إيه ؟؟ شيخ كبير و على راسه جبة !! و صموئيل قال .. إنت بتقلقني ليه .. عايز إيه ؟؟ ربنا سابك ؟؟ عموما بكرة هتخسر الحرب و هتموت و هتيجي تبقى معايا إنت و ابنك يوناثان !!
( لاحظ شبه كبير بين القصة و جلسات تحضير الأرواح حاليا نفس سلاح الشيطان على مر العصور زي ما هو )

مين بقى اللي حضر ده ؟؟ أولا شاول مشافش الروح .. العرافة اللي كانت بتقوله .. ثانيا لا مش صموئيل النبي طبعا .. لأ .. ربنا مش هيبعت نبيه عن طريق خطية هو نفسه منعها بوضوح .. إنما ده شيطان أخد شكل و صموت صموئيل النبي .. لأن الشيطان يقدر ياخد شكل ملاك حتى أو رجل أو مرأة .. زي قصة يوستينا و كبريانوس و غيرها العديد من القصص في بستان الرهبان ..

طيب إزاي عرف المستقبل ؟؟
تخمينات .. جيش العدو عددهم أكبر و أقوى بدليل رعب شاول الشديد اللي دفعه للعملة دي .. و طبيعي جدا في الحرب الخسرانة الملوك تموت .. و هو سمع جيش الفلسطينيين و قادته بيتكلموا عن الخطة و عن قتل الملوك ..
و طبعا ربنا كان ممكن ميسمحش بده .. لكنه كان عقاب من ربنا
و حصل برضه مع أخزيا الملك اللي استشار العرافين عشان يخف من مرضه .. فبعتله إيليا و قاله :
" أليس لأنه لا يوجد في اسرائيل اله تذهبون لتسألو بعل زبوب اله عقرون و لذلك قال الرب ان السرير الذي صعدت عليه لا تنزل عنه , بل موتا تموت "
شفتوا ربنا زعلان أد إيه بيقولهم هو انا مبقتش موجود ؟؟ شفتوا عقابه كان شكله إيه ؟؟

و خد بالك تعرف من القصة دي إن الشيطان لو طلبته ما بيصدق .. و مثال على كدة من ضمن الشعوذة في العصر الحديث اللي بنشوفها في الأفلام الأجنبي .. طفلين أمريكيين كانوا في قرية في كاليفورنيا إسمهم مارجريت و كاتي .. سمعوا صوت خبط على باب البيت .. إتخضوا بعدها بدأوا يتوهموا إنه ده الشيطان فبدأوا يردوا بنفس الطريقة .. و بدأوا ينشروا الكلام ده في القرية .. و القرية كلها ضلت عن الله و بداوا يصدقوا في القصة دي .. الشيطان ما صدق طبعا .. و استغل الضلالة دي ..

+ (9) إيه موقف الكتاب من تناسخ الأرواح ؟؟

تناسخ الارواح الأول ضلالة برضه فيما معناه إن الإنسان بيموت روحه بتدخل في إنسان تاني مولود بعدها .. و ممكن تدخل في كلب أو قطة أو فرس النهر برضه عادي ..
و هنا فيه قصة .. كان ملك و ملكة سيام في زيارة لفرنسا .. فشافت ملكة سيام كلب الملكة الفرنسية بدأت تعيط جامد جدا .. قالولها مالك .. قالتلهم الكلب ده عنده كام سنة ؟؟ قالولها إتنين .. قالتلهم أنا عرفته ده إبني .. و حضنته و قعدت تعيط .. فإضطروا يدوهولها هدية و هي مروحة ..
و هنا الكتاب بيحسم الموضوع
( وضع للناس ان يموتوا مره ثم بعد ذلك الدينونه ) [ عب 9 : 27 ]

+ (10) اتلخبطت شوية لما قريت .. و خفت أكتر .. و حاسس إني وقعت في بعض الخطايا دي أو إن الشيطان أذاني أو بياذيني .. أعمل إيه ؟؟

ببساطة شديدة .. إوعى تخاف .. " أنا هو لا تخافوا " .. خلي إيمانك قوي ..
صلي يوميا .. توب و إعترف بخطيتك .. إتناول .. صوم .. إحفظ المزامير و رددها .. قول ترانيم .. إكره الشيطان بكراهية الخطية ..
و إقرا شوية الآيات دي ..

" اما الخرافات الدنسه العجائزيه فأرفضها و روض نفسك للتقوي "
" فاخضعوا إذن لله، وقاموا إبليس فيهرب منكم. اقتربوا إلي الله فيقترب اليكم، فاخبرك من هم الذين يستطيع الشيطان أن يقوي عليهم.. الذين .. يتفرغون لشهوتهم كالفرس والبغل اللذين لا فهم لهما، أولئك للشيطان عليهم سلطان "
" أصحوا واسهروا لأن إبليس خصمكم كأسد زائر يجول ملتمساً من يبتلعه هو. فقاوموه راسخين في الإيمان، عالمين أن نفس هذه الآلام تجري علي إخوتكم الذين في العالم "
" الرب نوري وخلاصي ممن أخاف الرب عاضد حياتي ممن اجزع "
" إن سرت في وادي ظل الموت فلا أخاف شرا لأنك أنت معي "
" حاملين مرضي ومعذبين من أرواح نجسة… وكانوا يبرأون جميعهم "
" وكان يخرج شيطاناً وكان ذلك الشيطان أخرس… فلما أخرج الشيطان تكلم الأخرس فتعجب الجموع "
" الله أمين الذي لا يدعكم تجربون فوق ما تستطيعون "
" سمعان سمعان هوذا الشيطان طلبكم لكي يغربلكم كالحنطه و لكني طلبت من اجلك لكي لا يفني ايمانك "
" هذه الأيات تتبع المؤمنين .. يخرجون الشياطين بأسمي و يتكلمون بالسنه جديده .. يحملون حيات و ان شربوا شيئا مميتا لا يضرهم و يضعون ايديهم علي المرضي فيبرأون "
" إبليس قتال للناس من البدء ولم يثبت في الحق لأنه ليس فيه حق متي تكلم بالكذب فإنما يتكلم بما له لأنه كذاب وأبو الكذاب "
" و هم غلبوه بدم الخروف "
" رأيت الشيطان ساقطاً مثل البرق من السماء "
" في العالم سيكون لكم ضيق… ولكن ثقوا أنا قد غلبت العالم "
" اله السلام سيسحق الشيطان تحت ارجلكم سريعا "

المراجع :
الكتاب المقدس
كتاب الأرواح بين الدين و علماء الروح - قداسة البابا شنودة الثالث
التحفة اللوكاسية في حل المشاكل اللاهوتية - مثلث الرحمات الأنبا لوكاس اسقف منفلوط
العلاج الروحاني للأسحار أبونا اخنوخ سمعان مارمينا شبرا
كتاب "السحر" - نبيل صبحي حنا
استحاله تحريف الكتاب المقدس أبونا مرقص عزيز خليل
السحر .. القمص مينا جاد جرجس
السحر و الجان في مملكه الشيطان من منظور مسيحي جوزيف بـطـرس

By : Michael Magdy Mikhaiel