انت فى حرب على كنعان

انت فى حرب الامتلاك فى كنعان

هقولك كلام ممكن يخضك شوية وعكس الكلام اللي بتسمعه في الوعظات
وانا بقرا في سفر يشوع اكتشفت ان :
مش كله للخير ، مش كل حاجة بتخسرها هي مش من نصيبك ، ومش كل حاجة انت معرفتش توصلها هي دي ارادة الله ، واكتشفت ان مش دايما الله السبب في منع بركات عنك ، ومش كل المصايب اللي بتحصلك هي ضيقة من الله او صليبك وشيل ، ومش كله للخير وقدرك واستحمله ونصيبك كده
...
سفر يشوع عبارة عن حروب وامتلاك مدن في ارض كنعان ، الله كان بيكلم شعبه روحوا امتلكوا الارض دي
طول عمري بقرا وبسمع انهم كانوا دايما يمتلكوا ودايما ينتصروا..... لحد ما اكتشفت في بعض الاجزاء الله كان بيقسم القرعة للاسباط وكل الاسباط امتلكوا لكن مكتوب جزء خطير
(وَلَمْ يَقْدِرْ بَنُو مَنَسَّى أَنْ يَمْلِكُوا هذِهِ الْمُدُنَ)
يعني الله كاتبهالهم ومن نصيبهم لكن هما ماقدروش يمتلكوها بسبب ضعف معين قد يكون ضعف روحي او ضعف جسدي او ضعف ايمان او ضعف بسبب خطية
علشان كده لما الله يفتح قدامك ارض معينة للبركة قد تكون الارض دي (شخص ، وظيفة ، خدمة ،نفوس تحررها ، موهبة ، نمو روحي ...الخ) قاتل عشان تمتلكها لحد ما تجيب اخرك خالص شوف ايه الضعفات اللي مانعاك انك تمتلكها وعالجها لان عايز اقولك النص التاني من الاية انهم بعد كده تقووا وانتصروا وامتلكوا الارض
ماتستسلمش لجمل الوعظات المخدرة والقدرية ( كله للخير ، ربنا لو عايزلك ده هايكون ، نام وارتاح وربنا هايسوق )
اوقات بيكون الله آمر بالبركة وقاسم الارض دي باسمك بس حاطط تحدي فيه شوية جهاد ، جهاد عبارة عن انكار للذات واتضاع اكبر جهاد في الصلاة جهاد انك تشتغل علي نفسك وتنميها... تحدي قدامك انك تنتصر فيه علي نفسك وعلي ضعفاتك وتنمو وتتقوي وتمتلك ارضك
شوف ايه كنعان اللي في حياتك اللي الله فاتحلك سكة فيها ومش قادر تمتلكها .. وجاهد فيها مع الله اطلب ايمان قوي ضد كل عيان ... وجاهد فمعرفة وتنفيذ مشيئته حتي لو صعبة
انت_في_حرب_علي_كنعان