عقاب ربنا صعب قصه حقيقية
عقاب_ربنا_صعب_قوي...

السنه اللى فاتت شهر مايو تحديداً يوم ٢٤ انا فاكر اليوم ده كويس جدا ومستحيل أنساه ..
اليوم ده كنت قاعد بتغدى فى مطعم بدون ذكر أسماء ، المطعم ده اعرفه كويس جداً واعرف كل اللى شغالين فيه ، لازم كل يوم أكل من عنده بما إنى مغترب ، فهو يعتبر اكله حلو واسعاره مناسبه ...
المهم فى اليوم ده قامت خناقه كبيره بين صاحب المطعم وواحد شغال معاه اسمه كمال ..
كمال شاب عنده حوالى ٣٣ سنه متجوز وعنده ابن ..
صاحب المطعم مسك كمال بهدله ومرمطه ضرب وشتيمه لدرجة ان الناس جات من الشارع عشان يحوشوه..
الغريب بقى واللى لاحظته وسط الخناقه ان كمال ساكت وعينيه مليانه دموع ، وكل ما صاحب المطعم يحاول يضربه ، كنت بلاقى كمال بيبعد ، مع انه قادر يشتبك فى خناق معاه ويضربه ..
ساعتها انا وقفت وسط الزحمه مستغرب جدا من اللى بيحصل وعاوز اعرف فى ايه خصوصاً ان اللى اعرفه عن كمال انه بيشتغل فى المطعم من ايام ماكان عيل صغير ..
اللى قاله صاحب المطعم ان كمال سرقه..
انا ماكنتش مصدقه وواثق انه بيتبلا عليه ، لانه لو كان عاوز يسرق كان سرق من زمان ، خصوصاً انه أمين جدا ، مره اديته الحساب زايد خمسين جنيه بالغلط ورجعهالى ، عشان كده استبعدت الإتهام ده نهائى ..
اللى عرفته بعد كده ان صاحب المطعم كان بياخد نص مرتب كمال بحجه انه هايفتح مطعم جديد وهايشارك فيه كمال ، فضل على الحال ده اكتر من سنه ..
ومن شهر تعب ابن كمال بمرض خبيث على المخ، وكان محتاج فلوس عشان يعالجه ..
فاطلب من صاحب المطعم فلوسه وقاله على الحكايه كلها وانه مش هايقدر يشاركه ..
قام صاحب المطعم بكل بجاحه وفتونه قاله مالكش فلوس عندى واعلى ما فى خيلك إركبه ..
وعشان هو له معارف مهمين جدا ، كمال ماطالش مليم من فلوسه وكمان طلع حرامى ..
للأسف ماكنش فى اى دليل مع كمال ما يثبت ان الراجل ده خد منه فلوس ، لأنه كان مأتمنه جدااا ...
رسى به الحال انه عمل فرشه فول وفلافل فى نفس شارع المطعم وبدأت تشتغل معاه وتأثر على شغل المطعم نفسه ...
لكن الحكايه لغاية هنا ماخلصتش بالعكس دى بدأت ..
صاحب المطعم لما كمال أثر عليه فى شغله ، مش يسيبه فى حاله بعد ما نصب عليه وكل واحد ورزقه ، لا دا كمان لبسه قضيه انه سرق خمسين الف جنيه من خزنة المطعم .. عشان يقضى عليه تماماً
وجاب شهود تشهد ان مفاتيح المطعم والخزنه كانت دايماً بتكون مع كمال او صاحب المطعم ..
والشارع كله شاهد على الخناقه اللى حصلت بينه وبين كمال وطلعه قدام كل الناس ساعتها انه حرامى ..
وصل به الحال انه بعت حد نط على بيت كمال عشان يحط الفلوس ، ولما تدخل الحكومه تفتش البيت تلقاهم وتلبسه التهمه رسمى ..
يوم ٢٩مايو تم القبض على كمال واتعرض على النيابه واتحددتله جلسه بتاريخ ٢٤ يوليو نطق بالحكم ..
اليوم ده كلنا روحنا الجلسه لكن حصلت حاجه غريبه جداً ..
قبل النطق بالحكم لما وقفت جنب كمال قولتله ماتخافش ،ساعتها بص ليا وعينيه حمره من كتر الدموع قالى كلمه مستحيل انساها ..
هو ليه دايماً اللى بيقول يارب بيتظلم ؟
بصيتله وانا محتار ماعرفتش ارد عليه ، سكت ورجعت مكانى وانا فى دماغى مليون سؤال ..
ليه الشر نفوذه اقوى ، ليه الشر دايماً هو اللى بيحكم ، ليه الحق صوته ضعيف يكاد يكون ميت ، فينك يارب من ده كله ..؟
قطع تساؤلاتى زحمه شديده دخلت القاعه ، ووسطهم. راجل قاعد على كرسى متحرك ..
من شدة الزحمه ماقدرتش اشوف مين ده ..
الراجل ده طلب يدلى بأقواله فى القضيه ..
كلنا إتفاجأنا لما القاضى سأله على اسمه ..
طلع صاحب المطعم ..
نزلت عليه جلطه من اسبوع وسببتله شلل ..
فى شهادته ..قال
انا جاى هنا عشان اقول ان الراجل ده برىء ، الفلوس اللى اتمسكت فى بيته دى فلوسه اللى كان مشاركنى بيهم ، هو فى حد بيسرق فلوسه ؟ اتمنى انه يسامحنى لأنى ظلمته..
طلب صاحب المطعم من الناس اللى معاه انهم يقربوه من القفص عشان يتكلم مع كمال ..
دار حوار مابينهم من جملتين ..
- حقك رجعلك ، اتمنى انك تسامحنى ، عقاب ربنا صعب قوى ، انت دعيت عليا قولت ايه عشان يحصلى كل ده ؟
رد عليه كمال وهو مصدوم من اللى بيحصل وبصوت مكتوم وعيون باكيه من الفرحه قاله ..
- قولت يارب ..
+الرب يقاتل عنكم وانتم تصمتون (خروج١٤:١٤)
عزيزى القارىء
اوعى تفتكر ان ربنا مش سامع شكواك ، فقط لكل شىء تحت السموات وقت.
تعليقات
إرسال تعليق